هز معايا وذن القفه laissez un commentaire

قبل صاشي البلاستيك و قبل البانيي و قبل الشاريو كانت القفة. القفة التونسية المصنوعة في جربة و في توزر و في قابس و الجنوب بصفة عامة من سعف النخل و الي تفنن صانعها في نسج خيوطها و تزيينها بالألوان الزاهية. القفة الي تصلح للقضية و الي ترفع كل شيء خضرة و لحم و غلة و قضية الحانوت غير هات برك. القفة تتهز من وذناها. إيه القفة عندها زوز وذنين تتهز منهم و إذا ثقلت عليك شوف شكون يعاونك عليها كما نقولو يهز معاك وذن القفة. شوف قذاش القفة غارقة في تراثنا و لغتنا لدرجة أنها صارت رمز للتعاون على صعوبات الحيات خاصة منها المادية.

 لكن موش من بكري القفة صارت رمز للرشوة و محاولة التقرب من أصحاب الجاه. كيف واحد يهز في القفة و إلا يقفف معناه يحاول يوصل و ويترقى بطرق ماهياش أخلاقية. و رغم الي شي كما هذا يأسف القفة خاطاها و ديما تبقى هاك المنتوج التقليدي الي ورثناه على أجدادنا و الي صنعوه باش يسهلو بيه حياتهم و قضياتهم. و لو كل الناس في عوض الصاشي بلاستيك و الشاريو يرجعوللقفة الي تجي في برشا أحجام وألوان  تأكذو أننا قمنا بعمل كبير لفائدة بيئة بلادنا و حمايتها مالتلوث و خاصة نقضيو مرة وحدة على صاشيات البلاستيك الي موش برك تسمم االتربة والنبات و الحيوان و لكن زادة تفسد جمال الطبيعة. القفة رفيقتك في التسوق قيمة و ذخامة و تاريخ و تراث لازم نحافظو عليه. و السبيل الوحيد باش نحافظو على هالموروث التقليدي هو أننا نستعملوها في التسوق و بقدر ما نستعملوها بقدرما نساهمو في خلق أرزاق للناس الي يصنعوها و الناس الي يتاجرو فيها